LAPF

LAPF
LAPF

Alhamisi, 21 Juni 2012

ABDUL MNGATWA MPULIZA SAXOPHONE WA TANCUT ALMASI ORCHESTRA.


Katika nyimbo zote za Tancut Almasi, husikika vyombo vya upulizaji vya trumpet na saxophone. Tancut ilikuwa na mfumo wa kuwa na trumpet mbili, alto saxophone moja na tenor saxophone moja. Katika nyimbo zake za kwanza kwanza kulikuwa na wapigaji wawili Abdul Mngatwa na Mafumu Bilali Bombenga, Mafumu aliyekuwa anapiga alto saxophone aliacha bendi na Akuliake Salehe, maarufu kama King Maluu alijiunga na kushirikiana na Abdul. Hivyo katika nyimbo zote za Tancut Mzee Mngatwa alikuweko akipiga tenor saxophone. Leo niwaletee historia fupi ya Mzee huyu.
Abdul Mngatwa alizaliwa mwaka 1952 katika kijiji cha Kolang’a Misima wilaya ya Handeni. Alianza lower primary school mwaka 1960 na baadae akafaulu kuingia upper primary school na hatimae kumaliza darasa la 7 mwaka 1966. Akiwa Handeni siku moja aliingia katika dansi lililokuwa likipigwa na bendi ya  JKT Kimbunga, ambapo alimuona mpiga tumba anaemkumbuka kwa jina la Juma, ambaye alijifananisha nae na kujiona kuwa na yeye anaweza kujiunga na Jeshi hilo, hivyo basi ilipofika 1969 akajiunga na Jeshi la Kujenga Taifa kambi ya Mgulani, Dar es Salaam. Akiwa jeshini akajiunga na darasa la muziki ambapo mafunzo yalikuwa ni kusoma na kuandika muziki ambapo alifaulu vizuri sana, na akiwa na wenzie 26 walichaguliwa kwenda kambi ya Makutopora kuanzisha Brass band ya kambi hiyo. Walipofika huko walikaa miezi 6 wakishiriki katika kilimo cha zabibu maana kambi hiyo haikuwa na chombo chochote cha muziki, hili wakaliona ni tatizo kubwa, hivyo kundi zima wakaamua kutoroka na kurudi Mgulani, ambapo walipokelewa vizuri baada ya kutoa malalamiko yao. Malalamiko yalisikilizwa na safari hii walipewa vyombo kila mtu na chombo chake. Ikumbukwe kuwa mpaka wakati huu hawa jamaa walikuwa wakijua kusoma na kuandika muziki lakini walikuwa hawajui kupiga vyombo, hivyo wakaanza mara moja kila mmoja kujifunza chombo alichokabidhiwa, Mzee Mngatwa alianza kujifunza saxophone. Kati ya vyombo walivyopewa kulikuweko na magitaa, hivyo waliporudishwa tena Makutopora walianzisha Brass band na ‘Jazz’ band. Abdul Mngatwa aliteuliwa kuwa kiongozi wa kundi hili. Alilitumikia jeshi kama mwanamuziki mpiga saxophone hadi mwaka 1981. Mwaka 1982 alikwenda kujiunga na Asilia Jazz Band ya Dar es Salaam, hii ilikuwa bendi ya Wizara ya Utamaduni, ambayo ilikuwa inatumia vyombo ambavyo vilikuwa na utata wa umiliki kwani Patrick Balisidya mpaka umauti wake alikuwa anadai alidhurumiwa vyombo hivyo na Wizara hiyo, kwani alikuwa akieleza kuwa alipewa vyombo hivyo na Mzee Sarakikya baada ya kushiriki ‘Maonyesho ya mtu mweusi’ yaliyofanyika Lagos, Wizara nayo ilisisitiza kuwa vyombo hivyo ni mali ya serikali kwani vilinunuliwa na Wizara hiyo.
Abdul Mngatwa watatu toka kulia mstari wa mbele.
Mngatwa aliiitumikia Asilia Jazz mpaka Wizara yenyewe ilipoamua  kuifunga bendi hiyo.  Mwaka 1985 alijiunga na UDA Jazz Band wana Bayankata, alikaa hapa kwa mwaka mmoja na kufuatwa na viongozi wa Tancut Almasi Orchestra na kujiunga na bendi hiyo hadi nayo iliposambaratika 1993. Mzee Mngatwa ameshiriki nyimbo zote zilizowahi kurekodiwa na Tancut, ila pia aliwahi kurekodi na bendi ndogo ya Materu Stars ya Dodoma katika album yao ya Chabure, wakati akiwa bado Tancut Almasi Orchestra. Kwa sasa Mzee Mngatwa yuko Iringa akifanya shughuli ya askari mlinzi katika Msikiti ulioko maeneo ya Lugalo Iringa mjini.  









Hakuna maoni: