LAPF

LAPF
LAPF

Alhamisi, 7 Machi 2013

Marehemu Kabeya Badu(Jean Jacques Kabeya) azikwa


Hatimae mwanamuziki Kabeya Badu (1945-2013)amezikwa katika makaburi ya Kinondoni mchana wa leo kwenye muda wa saa kumi na nusu.













Kaburi la Freddy Ndala Kasheba
Katika mlolongo wa taratibu za mazishi haya King Kiki aliombwa kutoa maelezo machache kuhusu marehemu na katika maelezo mafupi aliweza kuleta maelezo ambayo yaliwatoa machozi watu wengi. King Kiki alieleza kuwa yeye, marehemu Ndala kasheba na sasa marehemu Kabeya wametoka mji mmoja huko Kongo unaoitwa Likasi. Kila mmoja katika ujana wake alikuwa akiendelea na shughuli zake za kimuziki japo walifahamiana. Kabeya hatimae alijiunga katika kundi maarufu la muziki wakati huo la Baba Gaston. Katika mizunguko yao ya maisha wakajikuta wako pamoja katika kundi Safari Nkoy ambalo  tayari King Kiki na Kasheba walikuwa wakilipigia, awali kundi hili lilikuwa liiitwa Orchestra Fauvette na lina historia ndefu hapa Tanzania. Mwaka 1974 Kiki alaliacha kundi hili na kuelekea Tanzania, ambako alifanya mambo mengi kimuziki katika bendi ya Maquis. Mwaka 1978 akiwa Orchestra Maquis, aliweza kuushawishi uongozi wa Maquis wakati ule kuwa kuna wanamuziki wangeweza kuongeza sana nguvu kwenye bendi hiyo kwa upande wa uimbaji, na ndipo Kabeya Badu, Kalala Mbwebwe na Chatanda Ngalula walipofuatwa Congo na kuja kujiunga na Maquis. Kiki alipohamia Orchestra safari Sound alihama na Kabeya na Kalala na kwenda kuanzisha Masantula Ngoma ya Mpwita. Kabeya alihamia tena Maquis na kisha kwenda Tancut Almasi ambako alikaa kwa miaka kadhaa kisha kurudi Maquis kwa muda na kuhamia Zaita Muzika wakawa tena wote na Kasheba. Kundi hilo hatimae ikawa Wazee Sugu na Kabeya kadumu na kundi hilo mpaka mwisho wa uhai wake.  Hapa ndipo King Kiki alionyesha masikitiko yake pale alipowaambia watu kuwa wenzie wote hao sasa ni marehemu. Kalala Mbwebwe alifia Iringa miaka kadhaa iliyopita.
Jambo la kushangaza ni kuwa bila kupanga kaburi la Kabeya Badi liko jirani kabisa na kaburi la Freddy Ndala Kasheba.

Hakuna maoni: