LAPF

LAPF
LAPF

Jumanne, 19 Machi 2013

NINI SIRI YA KIFO CHA MWANAMUZIKI GOBBY?

-->
Bendi ya Orchestra Makassy  chini ya Mzee Makassy, iliingia nchini ikitokea Uganda ikitwa Jamboz mwaka 1975 ilianza kupiga katika sehemu mbalimbali Dar es Salaam ikiwemo ukumbi maarufu wa New Africa. Ukumbi wa Hunters Ubungo ulikuwa ndio ukumbi wa nyumbani wa bendi hii. Wapigaji maarufu kama Mose Se Sengo maarufu kwa jina la Fan Fan pia ailipitia katika bendi hii wakati akiwa nchini hapa ambapo pamoja na bendi hii pia alipigia Super Matimila. Kati ya waimbaji maarufu waliokuwa katika bendi hii wakati wa mwishoni ya miaka ya sabini ni  Isihaka Baharia Gobby, Dingituka Molay, Mbombo wa Mbomboka na Mzee Makassy mwenyewe. Mwezi September 1977, jambo la kusikitisha sana lilitokea, mwanamuziki Gobby aliuwawa katika mazingira ya kusikitishwa, alichinjwa kama kuku. Kuna maelezo mbalimbali kuhusu siku hii na siku zilizofuata.

Kadri ya habari toka kwa mmoja wa wanamuziki ambaye anasema anakumbuka siku yule jamaa alipochukuliwa kwenda kuuwawa, kuwa ilikuwa Jumapili  na bendi ya Makassy walikuwa wamekwisha toka kupiga dansi la mchana la siku hiyo, mwanamuziki huyo ambaye kwa wakati huo alikuwa bendi ya Western lakini alikuwa kwenye masikani ya wanamuziki wa Makassy, yaliyokuwa kwenye maeneo ya Hunters Club ambako kulikuwa na vyumba vya wanamuziki kikiwemo chumba cha Gobby. Kwa maelezo ya mwanamuziki huyu, alikuja mtu aliyekuwa akifahamiana na marehemu na akamwomba waondoke wote na hiyo ikawa ndio mara ya mwisho kuonekana maiti ilikutwa barabara ya kuelekea ya Bagamoyo, ikiwa imechinjwa.

Mpenzi wa muziki maarufu aliihadithia hivi, ‘Hii stori naikumbuka kama imetokea jana. Kabla ya kifo chake nilimuona Marehemu Gobby akipiga kwenye harusi na Mzee Makassy kwenye ukumbi wa FFU Ukonga. Siku chache baadaye akauawa na maiti yake ikaokotwa maeneo ya Kunduchi. Miaka hiyo tulikuwa tunaishi Maweni Street, Upanga nyuma yetu Mtaa wa Aly Khan alikuwa anaishi Ofisa wa Ubalozi wa Zaire. Ubalozi wa Zaire ulikuwa Mtaa wa Maliki mkabala na Makao Makuu ya Skauti. Siku ya kifo cha Gobby na wiki iliyofuatia palikuwa na bonge tension baina ya Wanamuziki wa Kikongo na Wakongo wengine pale nyumbani kwa Ofisa wa Ubalozi na Ubalozini kwao Mtaa wa Maliki. Kesi ya kuuawa Marehemu Gobby iliisha kimya kimya nadhani ni kwa sababu za diplomasia ambapo ulihusisha ofisa wa ubalozi na kifo cha Marehemu Gobby. Nina hakika kwa asilimia nyingi sana baada ya kuuawa Marehemu Gobby ndipo Marquiz walipopiga ile nyimbo ya Wandugu Tuwe Na Huruma. (Wimbo huu ulitungwa na King Kiki ambaye amekuwa akikana kuwa wimbo huo haukuwa na uhusiano na kifo hicho). Marehemu Gobby alikuwa bonge la show man jukwaani: alikuwa mwimbaji na mchezaji mzuri sana pia alikuwa mlimbwende sana na kofia zake za Jackson Five, Mashati ya Slim fit ya mikono mirefu, mabugaluu na viatu vyake vya laizoni. Alikuwa na staili yake moja ya kucheza na kurusha mguu kuzunguruka microphone na wakati mwingine kufanya kama anajikata ngwala na kupiga hatua za upesi upesi kama anakimbia huku kasimama pale pale alipo! Walikuwa wakifanya vituko vyao jukwaani na Marehemu Remmy akiwa kwenye tumba hata kucheza ilikuwa vigumu kwa kuwastaajabia! kama aliweza kukamata macho yetu kina kaka kwa namna ile basi aliweza kuteka macho na nyoyo za kina dada kwa namna nyingine zaidi! Hii issue sidhani kama kuna mtu aliyetaka kuhusiana nayo kwa jinsi ilivyokuwa complicated. Siyo wanamuziki hata polisi wakati ule hawakutaka kutoa taarifa rasmi ya yale mauaji na sidhani kama kuna mtu alipandishwa kizimbani kujibu mashtaka! Hata hapa tunapoandika sote tunaizunguka zunguka! Si ajabu kabisa Mzee Kikii kusema nyimbo hii ilitokea tu ikatungwa baada ya mauaji ya Marehemu Gobby.’ Wengi wanaozungumzia mkasa huu hukubaliana kuwa sababu ilikuwa ni wivu wa mapenzi. Kuna wengine husema mwanamuziki huyu ambaye pia alikuwa fundi cherehani mzuri alianza urafiki na mke wa Afisa wa Ubalozi wa nchini kwao na ndio maana aliuwawa, lakini meneja wa kundi hilo wa wakati huo aliwahi kunambia kuwa katika kesi iliyowahi kufanyika kabla ya kifo hicho kibaya kwa tuhuma hizo na yeye mwenyewe akiweko, Gobby alikana kuwa na uhusiano na mama huyo, na alisisitiza kuwa alikuwa na uwezo wa kupata wapenzi wengine wengi tu akiwa kazini kwake, hivyo hakuwa na sababu na kufuata mke wa kiongozi wake. Ni hivi juzi tu mpenzi mwingine wa muziki wa wakati huo akanambia kisa cha kuuwawa Gobby ni wivu wa mapenzi na mpenzi mwenyewe alikuwa anaitwa Hidaya aliyekuwa akiishi Upanga karibu na shule ya Shaaban Robert. Haya ni wazi bado mapengo ni mengi katika mkasa huu. Lolote jipya litakalopatikana katika mkasa huu tutalimwaga hapa.


Hakuna maoni: